Breaking

Thursday, July 14, 2016

உட்காரவும் கூடாது,சிறுநீர் கழிக்கவும் போகக்கூடாது-கேரளாவில் கொடுமை

உட்காரவும் கூடாது,சிறுநீர் கழிக்கவும் போகக்கூடாது-கேரளாவில் கொடுமை



கேரளாவில் செயல்படும் பெரும்பாலான ஜவுளிக்கடைகளில் ஊழியர்கள் வேலை நேரத்தில் உட்காரக் கூடாது,சிறுநீர் கழிக்க கூட செல்லக் கூடாது என கடை நிர்வாகத்தால் வற்புறுத்தப்படுகின்றனர்.இதை எதிர்த்து ஊழியர்கள் போரட்டம் நடத்தியும் இந்த விதிமுறையில் எந்த மாற்றமும் நிகழவில்லை.

அரசு நிர்ணயித்த குறைந்தபட்ச ஊதியத்தை தர வேண்டும்,சிறுநீர் கழிப்பதற்காக கழிவறை செல்ல அனுமதிக்க வேண்டும்,உட்கார அனுமதிக்க வேண்டும் ஆகிய கோரிக்கைகளை வலியுறுத்தியதற்காக கடந்த 2013-ஆம் ஆண்டு திருச்சூரில் உள்ள கல்யாண் சாரிஸ் ஜவுளிக்கடையில் வேலை செய்த ஐந்து பெண் ஊழியர்கள் பணியிலிருந்து நீக்கப்பட்டனர்.இதனை எதிர்த்து ஐந்து பேரும் போராட்டம் நடத்தியதை தொடர்ந்து மூன்று மாதங்களுக்கு பின்னர் அவர்களின் கோரிக்கைகளை ஏற்றுக்கொண்ட கடை நிர்வாகம்,அவர்களை மீண்டும் பணியில் சேர்த்துக் கொண்டது.

ஆனால் இந்த போராட்டம் நடந்து மூன்று ஆண்டுகள் ஆன பிறகு 100 சதவீதம் தங்களுக்கான அடிப்படை வசதிகள் இன்னும் செய்து தரப்படவில்லை என குமுறுகின்றனர் கேரளாவில் உள்ள பெண் ஊழியர்கள். 12 மணி நேர வேலை நேரத்தில் 15 நிமிடங்கள் மட்டுமே உணவு இடைவேளையாக அளிக்கப்படுவதாகவும், அப்போது மட்டுமே உட்கார முடியும் என குமுறுகின்றனர் பெண் ஊழியர்கள்.மேலும் ஊழியர்கள் எத்தனை தடவை கழிவறை செல்கிறார்கள்,எவ்வளவு நேரம் எடுத்துக் கொள்கிறார்கள் என்பதை கண்காணித்துக் கொண்டே இருப்பார்கள் எனவும்,தேவையில்லாத சின்ன காரணங்களை கூறி சம்பளத்தில் பிடித்தம் செய்வதாகவும் கூறி வருத்தப்படுகின்றனர்.

தங்களை உட்கார கூட அனுமதிக்க வேண்டாம்,ஆனால் கழிவறை செல்லவாவது அனுமதிக்க வேண்டும் என்பதே தங்கள் குறைந்தபட்ச கோரிக்கை என்கின்றனர் பெண் ஊழியர்கள்.ஆனால் இவை எதையும் கேரள ஜவுளிக்கடை நிர்வாகங்கள் கண்டுகொள்வதாக தெரியவில்லை.

சமூக ஆர்வலர்கள் சிலரால் சமீபத்தில் தேசிய மனித உரிமை ஆணையத்தின் கவனத்திற்கு இந்த பிரச்சனை கொண்டு செல்லப்பட்டிருக்கிறது.இதனை தொடர்ந்து கடந்த ஜூலை ஒன்றாம் தேதி கேரள அரசுக்கு நோட்டீஸ் அனுப்பியுள்ள தேசிய மனித உரிமைகள் ஆணையம்,இந்த குற்றச்சாட்டு குறித்து விளக்கம் அளிக்குமாறும் கேரள அரசுக்கு உத்தரவிட்டுள்ளது.

No comments:

Post a Comment

Comment here